ركلة البداية

هوه يعنى ايه تدوين؟
يعنى شوية شخبطه على الورق اللى جنبك
بتكتب فيهم اللى داير فى بالك
موضوع حصل لك
فكرة عايز تناقشها
رأى فى حد مش عاجبك
فضفضة لنفسك بس بصوت عالى

بس مشكلة الشخبطة دى ان الورق اللى هتشخبط عليه
هيفضل قدامك وقدام كل الناس طول الوقت وكل العمر
وحتى بعد العمر

ودى المشكلة
لان فكرتك النهاردة غير فكرتك بكره
واللى انت شايفه النهاردة كويس بكره هتشوفه وحش
واللى انت عايز تفضفض بيه دلوقتى , يمكن بعد شوية تندم عليه

والالعن من كده:
لما تفكر ان فى يوم من الايام حفيدك يقرأ شخبطتك دى

ياترى وجهة نظره عنك هتكون ايه؟
يا ترى هيشوفك ازاى؟
هيقدر يعرفك كويس ؟

هوه موضوع صعب
خاصة لما تبقى شخبطتك دى مش مجرد شخبطة
دى صورتك اللى الناس هتشوفك فيها


بس الجميل ان يبقى ليك صوت
يبقى ليك رأى

لما يبقى ليك فى كل موضوع حضور
ما تبقاش مجرد مشاهد
وتبقى مشارك

حتى لو كان رأيك مش هيشوفه غيرك انت بس

كفاية ان يبقى ليك رأى